Baada ya makada watatu wa Chama Cha Mapinduzi (CCM) Visiwani Zanzibar akiwemo Balozi Ally Karume na Omar Shea kuchukua fomu ya kuwania urais kupitia chama hicho mapema wiki hii, Waziri wa Ulinzi na Jeshi la Kujenga Taifa, Dk. Hussein Mwinyi naye amejitosa kwenye mbio za urais Zanzibar baada ya kuchukua fomu leo Juni 17, 2020.
Waziri Dkt. Hussein Mwinyi amechukua fomu na kutangaza nia ya kuwania Urais kwa tiketi ya CCM katika Serikali ya Mapinduzi Zanzibar (SMZ).
Dkt. Mwinyi amechukua fomu hiyo leo mchana katika Ofisi Kuu ya CCM, Kisiwandui, mjini Unguja.
Mwanasiasa huyo ambaye ni mtoto wa Rais wa Serikali ya Awamu ya Pili, Ali Hassan Mwinyi mara baada ya kuchukua fomu amewaambia waandishi wa habari kwamba hana cha kuzungumza kwa leo bali atazungumza akishajua ni nini kilichomo kwenye fomu hizo.
“Leo sikuja kuzungumza na waandishi wa habari, bali nimekuja kuchukua fomu na nimeshafanya hivyo na ninachokwenda kukifanya ni kuangalia matakwa yaliyomo kwenye fomu hizo,” amesema Dkt. Mwinyi.
Wanasiasa wengine ambao tayari wamechukua fomu za kuwania Urais wa Serikali ya Mapinduzi Zanzibar kwa tiketi ya Chama Cha Mapinduzi (CCM) ni Mbwana Yahya Mwinyi, Omar Sheha Mussa na Balozi Ally Karume.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
