RC MNDEME ASHIRIKI VIKAO MAALUMU VYA BARAZA LA MADIWANI KATIKA HALMASHAURI TATU KUJADILI HOJA ZA CAG

Mkuu wa Mkoa wa Shinyanga Mhe. Christina Mndeme amehitimisha ziara yake ya kuhudhuria vikao Maalumu vya Baraza la Madiwani katika Halmashauri tatu wilayani Kahama vya kujadili hoja za CAG.

Mabaraza aliyohudhuria ni Baraza la Manispaa ya Kahama, Ushetu na kuhitimisha katika Halmashauri ya Msalala ambapo madiwani walikuwa wakijadili

mapendekezo kutoka kwa Mkaguzi na Mdhibiti Mkuu wa Hesabu za Serikali (CAG) kwa mwaka wa fedha 2023.

huku akizipongeza Halmashauri hizo kwa namna ambavyo zimepambana kujibu na kufuta hoja.

Akiongea wakati wa kuhitimisha ziara yake ya kuhudhuria vikao kwenye Mabaraza hayo katika Halmashauri ya Msalala Mhe. Mndeme amezipongeza Halmashauri zote tatu namna zilivyopambana kujibu na kufuta hoja.

Amesema, madiwani pamoja na watumishi wote wa Halmashuri wakishikamana kwa pamoja na kufanya kazi kwa ushirikiano pamoja na kuzingatia misingi, Sheria, Kanuni na taratibu za kazi pamoja na kutanguliza uzalendo, kuna uwezekano kabisa wa kuondoa hoja zote.

"Hakika nawaambia kuwa tunao uwezo mkubwa wa kuepuka na kuondoa kabisa hizi hoja iwapo tutashikamana na kufanya kazi kwa misingi ya Sheria, Kanuni na Taratibu kwa pande zote mbili yaani Waheshimiwa Madiwani na Menejimenti huku tukitanguliza uzalendo kwa Nchi yetu," amesema Mhe. Mndeme.

Kando na hayo, Mhe. Mndeme akizipongeza Manispaa ya Kahama kwa kuweza kufuta hoja 48 kati ya 67, Ushetu imefuta hoja 30 kati ya 73 na Halmashauri ya Msalala imefuta hoja 28 kati 59 huku hoja nyingine zikiwa katika kufanyiwa kazi ili zifutwe zote.

Aidha kipekee ameipongeza sana Halmashauri ya Msalala kwa kuweza kukusanya asilimia 103 ya mapato kabla ya mwaka wa fedha kuisha na Manispaa ya Kahama kwa kuendelea kupata Hati Safi kwa miaka 5 mfululizo na kwa upande wa Ushetu kwa kuonesha mikakati mizuri ya kuondoa Hati Chafu na kuipaisha kiutendaji na kuhudumia wananchi wake.

Pamoja na maagizo mengine, lakini pia Mhe. Mndeme ameelekeza Halmashauri hizo kuzingatia sana matumizi ya Mashine za Kukusanyia Mapato (POS) kwamba wahakikishe hakuna pesa inayobakia mikononi mwa wakusanyaji ili kuepusha matumizi ya pesa mbichi.

Kwa upande wake Mkuu wa Wilaya ya Kahama Mhe. Mboni Mhita alimshukuru Mhe Mndeme kwa kazi anazozifanya za kuwasaidia Halmashauri katika kutekeleza majukumu yao kwa weledi, akampongeza kwa kushiriki kwake katika Halmashauri hizi tatu ambazo zipo katika Wilaya yake na mwisho alimuahidi kuwa wanakwenda kuyatekeleza yote aliyoelekeza.

Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464