MADIWANI MANISPAA YA KAHAMA WAMEOMBA KUPUNGUZIWA ANKARA ZA MAJI NA UPATIKANAJI MAENEO YA KATA ZA PEMBEZONI

Kaimu mkurugenzi wa manispaa ya Kahama Clement Mkusa.

Na Kareny Masasy,Kahama

MADIWANI wa halmashauri ya manispaa ya Kahama mkoani Shinyanga wameomba kuangalia uwezekano wa kupungua Ankara ya maji kwa wateja wao na upatikanaji wa maji safi na salama maeneo ya kwenye kata za pembezoni.

Baadhi ya madiwani hao akiwemo diwani wa kata ya Mondo Kija Peja leo tarehe 20,Septemba,2023 katika kikao cha kawaida cha baraza la madiwani amesema kijiji cha Mwanzwagi na Mondo vinakabiliwa na changamoto ya ukosefu wa maji mpaka ilifikia hatua ya kutaka kuifunga shule kwa kukosa maji.

Diwani Peja amesema wananchi unapoitisha mkutano wa hadhara kero yao kubwa ni upatikanaji wa maji hivyo alitaka kuhakikishiwa na wenye dhamana ya kuwapatia maji ni lini maji watapata wananchi wa maeneo hayo.

Diwani wa kata ya mjini Hamidu Juma amesema ni bora waelezwe ukweli kwani wananchi wamekuwa wakiwatuhumu madiwani wameshindwa kusikiliza kero zao nakuzitatua pia kero nyingine ni Ankara za maji kuwa bei kubwa.

Diwani Juma amesema serikali ingeleta luku za maji kama ilivyofanya shirika la nishati ya umeme (Tanesco) kwenye umeme ukiishiwa salio basi lakini sasa Ankara zimekuwa kubwa na baadhi ya wananchi wanashindwa kumudu gharama hizo.

“Suala la kijiji cha Mwanzwagi na Mondo tumeanza kuliongelea muda mrefu kwenye vikao bila kupata ufumbuzi hivyo tunakuomba mstahiki meya uwasiliane na Ruwasa kuona nini kinafanyika majibu ya kufuatilia hayana afya”amesema diwani Juma.

Mstahiki meya wa manispaa hiyo Yahaya Bundala amewaomba madiwani walichukulie suala hili kwa pamoja ili kuhakikisha wananchi wanapata huduma ya maji nzuri.

Kaimu mkurugenzi wa manispaa hiyo Clement Mkusa amesema suala hilo wamelichukua nakulifanyia kazi.

Afisa mahusiano kutoka mamlaka ya maji Kahama (KUWASA) John Mkama amesema wako mamlaka mbili ambao wanatekeleza uhitaji wa maji kuna Ruwasa na Kuwasa hivyo maeneo ya vijijini ni Ruwasa na wanampango wa bajeti yao.

Mkama amesema kuhusu Ankara ya maji kuwa kubwa haina uhusiano na bei ya maji hivyo amewaomba madiwani kuendelea kuwaelimisha wananchi matumizi bora ya maji .

"Kuhusu mita za luku katika maji zipo kwa wateja 25 lakini bado hazijaleta ufanisi mkubwa kwa wateja hao na ankara ya maji kwa uniti moja ni sh 2029 hivyo tujikite kutoa elimu kwa wananchi"amesema Mkama .

Mwenyekiti wa chama cha Mapinduzi (CCM )wilaya ya
Kahama Thomas Myonga amepongeza kwa madiwani kuibua hoja na kero huku akiipongeza serikali kwa kuleta miradi mingi ya maendeleo kama ujenzi wa shule,vituo vya afya na sasa barabara zinaenda kuboresha.