RC MNDEME AWATAKA WATENDAJI WA VIJIJI NA KATA KUMALIZA MIGOGORO YA ARDHI KWENYE MAENEO YAO

Watendaji wa Vijiji,Kata na Maafisa Tarafa wakizungumza na Mkuu wa Mkoa wa Shinyanga Christina Mndeme

Mkuu wa Mkoa wa Shinyanga Christina Mndeme akizungumza na Watendaji wa Vijiji,Kata na Maafisa Tarafa kutoka Halmashauri tatu za Mkoa huo ambazo ni Kishapu,Shinyanga na Manispaa ya Shinyanga

Na Shinyanga Press Club Blog

Mkuu wa Mkoa wa Shinyanga Christina Mndeme amewaagiza watendaji wa Vijiji,Kata na maafisa Tarafa kutoka Halmashauri ya Kishapu,Shinyanga na Manispaa ya Shinyanga kuhakikisha wanakwenda kumaliza migogoro yote ya ardhi iliyopo kwenye maeneo yao bila kuonea mtu.

Ametoa agizo hilo kwenye kikao kazi kilichowakutanisha watendaji wa Vijiji,Kata na maafisa Tarafa na kuwaagiza kwenda kusimamia shughuli mbalimbali kwenye maeneo yao ikiwa ni pamoja na kuhakikisha migogoro ya ardhi inakwisha kwa kufuata taratibu.

Kwa upande wa sekta ya maji Mkuu wa Mkoa amesema bado kuna baadhi ya watu wanalima karibu na vyanzo vya maji na kuharibu miundombinu ambayo imegharimu fedha nyingi ili kuwasaidia wananchi kupata huduma.

Amewataka kwenda kusimamia na kuhakikisha vyanzo vya maji vyote na miundombinu yake vinakuwa salama ili vidumu na kuwanufaisha wananchi wengi zaidi kwa miaka mingi.

Katika hatua nyingine Mkuu wa Mkoa wa Shinyanga Christina Mndeme amewataka watendaji wa Vijiji,Kata na maafisa Tarafa katika Halmashauri zote za Mkoa huo kusimamia vizuri Fedha za Miradi ya maendeleo kwenye maeneo yao ili kuleta tija.

Amesema tangu serikali ya awamu ya sita iingie madarakani Mkoa wa Shinyanga umepokea Sh Trioni moja kwa ajili ya shughuli za maendeleo na uendeshaji,Fedha ambazo ni nyingi zinahitaji kuwa na usimamizi mzuri ili kufikia lengo lililokusudiwa na serikali.

"Nyinyi ndiyo wasimamizi wakubwa wa shughuli za maendeleo katika maeneo yenu nawaomba nendeni mkaongeze bidii ili kuhakikisha miradi yote inayotekelezwa inakamilika kwa kiwango na ubora"amesema Mkuu wa Mkoa Mndeme

Amesema kila mradi unaotekelezwa watendaji wa eneo husika unawahusu hivyo ni wajibu wao kufuatilia ili kujua kila hatua kwani wao ndiyo viongozi wa maeneo hayo.

Amewataka kwenda kusimamia maono ya Mhe: Rais Dk Samia Suluhu Hassan kwa vitendo bila kuogopa ili mradi wasivunje sheria,huku akiwasisitiza kujiepusha na vitendo vya rushwa kwani ni adui wa haki.