Familia ikiwa kwenye mazungumzo ya kumshawishi mwanafunzi aliyegoma kurudia darasa la nne baada ya kufeli mara ya pili.
Na Kareny Masasy
HATIMAYE Mwandishi wa habari na Mwalimu mkuu wa shule hiyo wamefanikisha kumshawishi mwanafunzi Sara Shija kuendelea na masomo na kufanya mtihani wa darasa la nne mwezi Oktoba mwaka huu.
Kugoma kwake kuingia darasani kulitokana na matokeo ya darasa la nne kutangazwa na kuelezwa kuwa amefeli mtihani kwa mara ya pili kuingia darasa la tano.
Ambapo viongozi wa kata ya Lyabukande halmashauri ya wilaya ya Shinyanga wameweka mikakati ya kupinga wanafunzi kuwa waangalizi wa familia hali ambayo imewafanya baadhi yao kuwa watoro wa rejareja shuleni.
Ofisa maendeleo ya jamii kutoka kata hiyo Salum Mwang'imba amesema wakati wa shirika la Woman Elders Development Organisation (WEADO) linalopinga ukatili lilifika kutoa elimu juu ya kupinga ukatili na kuunda mabaraza Saba ya watoto na wanawake.
Mwang'imba amesema ili kuondoa changamoto hiyo wametoa elimu ya kupinga mila potofu kwa wazee wa kimila 30 na viongozi wa sungusungu wa kila kijiji ambao wamepewa jukumu la kusimamia na kuweka ajenda ya kudumu kwenye vikao na mikutano ya hadhara.
"Tumebaini watoto kupewa majukumu ya kulea familia wazazi wao wanakwenda kwenye vibarua ambapo wanashindwa kujisomea hata muda wa kupumzika "amesema Mwang'imba.
Mtendaji wa kata hiyo Shadrack Malando amesema suala la wanafunzi kuachiwa mzigo wa kulea familia kipindi cha masomo limetokana na familia zao hasa ulezi wa upande mmoja.
Mratibu elimu kata Haruni Ibrahimu anasema kuna vijiji Saba vyote vina shule ya msingi na shule ya sekondari moja wameanza kuthibiti utoro kwa kuanza kutoa elimu kwa wanafunzi na wazazi.
Mkurugenzi wa shirika la WEADO Ananiel Nnko anasema wanafunzi kupewa majukumu ya kulea familia ni ukatili mabaraza yaliyoundwa yatasaidia kupaza sauti na kufichua vitendo vya ukatili wanavyofanyiwa.
Kwa mujibu wa sensa ya watu na makazi ya mwaka 2022 kupitia ofisi ya taifa ya Takwimu (NBS) inaeleza kaya zinaoongozwa na wanawake ni asilimia 35.8 hapa nchini ikiwa mkoa wa Shinyanga una asilimia 36.5 juu ya wastani wa kitaifa.
Kaya kuongozwa na wanawake hasa maeneo ya vijijini ndiko kunawafanya watoto washindwe kuhudhuria vyema darasani na kuwapatia majukumu ya kulea familia.
Kaimu ofisa elimu mkoa wa Shinyanga Dedan Rutazika anasema watoto wote wenye utoro wa rejareja walihakikisha wanawekewa ulinzi wakutosha kwenye maeneo yao ili wafikie malengo.
Ambapo Rutazika amesema kwa shule za msingi upo utoro wa reja reja kwa wanafunzi ikiwa kuna wanafunzi 16 ,276 wameripotiwa kuwa na utoro huo kwa mwaka 2023.
Rutazika amesema utoro huo kuna wavulana 8497 na wasichana 7779 kwa shule za msingi 672 zilizopo.
Mwanafunzi akifeli mtihani wa upimaji anapewa nafasi ya kurudia darasa hilo na akifaulu anaruhusiwa kuendelea na masomo hivyo wanafunzi anayo nafasi.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
