WADAU SEKTA YA MAJI WAIPONGEZA RUWASA,WATOA USHAURI

Meneja wa Ruwasa mkoa wa Shinyanga Mhandisi Juliette Payovera

Kareny Masasy,Kahama

WADAU wa sekta ya maji wilayani Kahama mkoani Shinyanga wamepongeza wakala wa maji na usafi wa mazingira vijijini (Ruwasa) kwa kutekeleza upatikanaji wa maji kwenye maeneo mengi.

Ambapo wadau hao pia wameshauri baadhi ya maeneo kuwapatia mtandao wa maji wa visima virefu na kuwashawishi wananchi wavute maji majumbani mwao waondokane na utumiaji wa Magati.

Hayo wameyasema leo tarehe 15,Novemba,2023 kwenye kikao cha wadau wa sekta ya maji wilayani Kahama nakuhudhuriwa na taasisi mbalimbali za serikali ikiwemo ofisi ya bonde la maji ziwa Tanganyika huku mgeni rasmi akiwa mkuu wa wilaya hiyo Mboni Mhita.

Mkuu wa wilaya ya Kahama Mboni Mhita amesema Ruwasa wamekuwa wakisimamia vizuri utekelezaji wa miradi ya maji na sekta hii imekuwa ikitumia gharama kubwa kuliko sekta yoyote ndiyo maana utekelezaji unakwenda kwa awamu mradi mmoja unatumia fedha nyingi na serikali ya awamu ya sita ndiyo kipaumbele maji.

Diwani wa kata ya Busangi Alexander Mihayo amesema maji yakipatikana kwenye gati kijiji kimoja bado haitamsaidia mwananchi kinachotakiwa kuangalia vitongoji viko mbalimbali ni bora mradi wa visima virefu kila mmoja yatamfikia kwenye kitongoji.

Diwani wakata ya Ulowa Gabriela Kimaro amesema kata hiyo haina maji hata vyanzo vya maji visima virefu hakuna kutokana na walivyopima wataalamu hawakupata maji ameomba Ruwasa kuharakisha mradi wa maji ziwa Victoria kwani wananchi wanateseka.

Mwenyekiti wa kamati ya afya, elimu na maji kutoka halmashauri ya Msalala ambaye ni diwani wa kata ya Segese Joseph Manyara amesema Ruwasa wafanye utaratibu wa kuzipatia taasisi kama shule,vituo vya afya ,Zahanati huduma ya maji ni muhimu kwani wanateseka maeneo mengine.

Mhasibu wa CBWSO kutoka Ukamwana Masolwa James amesema zipo changamoto za baadhi yao kutopeleka fedha, shule kutolipa Ankara za maji kwa madai bajeti yao ni ndogo ila ameipongeza Ruwasa kwa usimamizi mzuri nakufanya fedha kutopotea.

Meneja wa Ruwasa wilaya ya Kahama mhandisi Paschal Mnyeti amesema katika bajeti ya mwaka 2022/2023 kuna miradi 14 kwa halmashauri zote tatu za Manispaa ya Kahama ,Ushetu na Msalala na kutengewa sh Bilioni 21.5 huku CBWSO zikiwa kumi na moja.

Mhandisi Mnyeti amesema miradi mingi imeendelea kutekelezwa na mingine imefanyiwa usanifu huku akizitaka CBWSO kutunza jenereta zinazosaidia wao kupata maji pindi umeme ukikatika ikiwa maeneo mengi hayana umeme na mpango upo wakuwapelekea.

“Mradi wa maji Chona,Bukomera na Ubagwe upo kwenye utaratibu wa kumpata mkandarasi ili mradi huo uanze kutekelezwa na ushauri uliotolewa na wadau wote wamepokea na watafanyia kazi”amesema mhandisi Mnyeti.

Meneja wa Ruwasa mkoa wa Shinyanga Mhandisi Juliette Payovera amesema katika bajeti ya mwaka huu halmashauri ya Ushetu imewekwa kwenye mpango wa kupata maji ya ziwa Victoria wanachosubiri ni waziri wa fedha kuidhinisha na utekelezaji uanze.

“Vyombo vya watoa huduma ya maji ngazi ya jamii (CBWSO ) mkoa wa Shinyanga wataanza utaratibu wa kutumia mfumo wa malipo kwa serikali ili kuondoa mwanya wa upoteaji wa fedha na watapatiwa semina juu ya ulipaji kwa njia hiyo” amesema Mhandisi Payovera.

Mwakilishi wa mkurugenzi wa bonde la maji ziwa Tanganyika Eljah Bachuta amesema lazima watu watunze vyanzo vya maji kwa kuvisimamia vizuri bila kuweka taka zinazotengeneza sumu kwenye maji,kutotumia kemikali na kusimamia sheria na kanuni za usimamizi wa Rasilimali ya maji.

Meneja wa wakala wa vipimo (WMA) mkoa wa Shinyanga Emmanuel Malanga amesema ipo sheria ya vipimo sura namba 340 kanuni ya nne inayotaka mita ya dira za maji lazima kupimwa ili isimpunje mtumiaji au kusababisha hasara.