DC MTATIRO AWABANA WATENDAJI SERIKALI MIRADI YA AFYA, MAJI, BARABARA, UMEME NA ELIMU-

Na Estomine Henry,

SERIKALI wilayani Shinyanga imeendelea kuchukua hatua za kufuatilia miradi ya maendeleo kwa wananchi lengo kutathimini utekelezaji wa ilani ya Chama cha Mapinduzi kupitia kazi zinazotekelezwa na Halmashauri.

Mkuu wa wilaya ya Shinyanga Julius Mtatiro alisema hayo Januari,15,2025 katika muendelezo wa ziara ya kutembelea kijiji kwa kijiji nakufanya mikutano ya hadhara kwenye kata za usanda na samuye katika Halmashauri ya wilaya ya Shinyanga.

Mtatiro akiambatana na wataalam wa Halmashauri, viongozi wa chama cha Mapinduzi na watendaji ngazi ya kata na vijiji ili kutoa majibu juu ya kero za wananchi zinazowasumbua muda mrefu.

“Lengo la ziara hii ni kutoa fursa kwa wananchi kueleza changamoto zao ambazo serikali inapaswa kuzitekeleza na sisi viongozi kuzitolea majibu namna ya utekelezaji wake kupitia miradi”amesema Mtatiro.

AFYA.

Mkuu wa wilaya Mtatiro amemtaka Mtendaji wa kata ya samuye kueleza ukweli juu ya kiasi cha Shilingi Milion 11.7 za kijiji cha Mwang”halanga zilizokusanywa kupitia michango ya Shilingi 28,000 kwa kila kaya zilipokwenda.

Julius Kiyenzi,Mwenyekiti wa kijiji cha Mwang”halanga amesema kuna kaya 417 kwa mujibu wa sensa ya watu na makazi ya mwaka 2022 huku akieleza anayetuhumiwa kwa wizi wa shilingi 500,000 ni mkazi mmoja anayetambuliwa kwa jina la Chagu Tungu.

Mtendaji wa Kata ya Samuye Hellen Kayagila ameeleza shilingi Milioni 11.7 ziko benki ya NMB na hatua iliyomfanya Mtatiro kupiga simu kwa meneja wa benki na kuthibitisha uwepo wa kiasi hicho cha fedha na kurudisha matumaini ya furaha kwa wananchi.

Kaimu Mkurugenzi Halmashauri ya wilaya ya Shinyanga Edward Maduhu alitoa sababu ya kukwamishwa na mfumo wa Nest ambao unaruhusu manunuzi huku Mkuu wa wilaya Mtatiro kuamua kutoa agizo ifikapo januari 27, 2025 zoezi la upauaji jengo la zahanati ufanyike haraka;

MIUNDO MBINU.

Baadhi ya Wananchi ambao ni Eliasi Mapalala na Peter Michael wakazi wa kata ya usanda waliiomba serikali kuwakarabatia miundombinu ya barabara inayotokea usanda kwenda Manonga.

Mkandarasi wa Wakala wa Barabara mjini na Vijijini (TARURA) Emmanuel Maige ameeleza barabara ya usanda –Manonga iko katika mpango wa bajeti ya mwaka 2025/26.

Mkandarasi wa Wakala wa Barabara mjini na Vijijini (TARURA) Emmanuel Maige akijibu hoja.

KILIMO.

Wananchi wa kata ya usanda walilamikia juu ya ukosefu wa mbolea kwa ajili ya kilimo

Kaimu Mkurugenzi wa Halmashauri wilaya ya Shinyanga Edward Maduhu amesema wakala anayesambaza ni mmoja na vituo vipo vinne

Mkuu wa wilaya Mtatiro ameshauri ni vema kuwe na AMCOS zenye nguvu zitakazosaidia wakulima kuwa na mbolea za ruzuku na pembejeo .

“Kama hakuna vyama vya msingi imara,tutaendelea kuwa na matatizo ya kudumu ya ukosefu wa mbolea,Mkulima mmoja atakufa peke yake ikiwa hakuna AMCOS” amesema Mtatiro.

UMEME.

Diwani wa kata ya Usanda Forest Nkole amesema huduma ya umeme iko kwa asilimia 30 kwa kufikia vijiji 3 kati ya 10 na ameiomba serikali kuharakisha kuwapatia umeme kufikia asilimia 75.

Baadhi ya taasisi za serikali kama shule za kata ya samuye kama Mwabenda, Manonga hazina huduma ya umeme na walimu wanapata changamoto katika uendeshaji wa shule.

Mkuu wa wilaya Mtatiro ameeleza serikali imesha saini mikataba ya usambazaji wa huduma ya umeme kwa kila kitongoji nchini.

ELIMU.

Wananchi Paschal Julius Kasenga mkazi wa kijiji cha singita alihoji kuhusu michango ya shule inayotolewa na wazazi haitolewi mrejesho wa shughuli zilizofanyika.

Mtatiro ameagiza wakuu wa shule kuhakikisha wanatoa taarifa za michango ya shule waliyokubaliana na wazazi ili kuepusha migogoro.

Mtatiro alisisitiza wananchi kupeleka watoto shule na hata wakiwa na mapungufu ya vifaa ni vema watote taarifa kwa wakuu wa shule.

“Usipopeleka mtoto shuleni utahusika na adhabu ya Shilingi 100,000 au kifungo cha miezi sita ”amesema Mtatiro.

MAJI.

Baadhi ya wananchi wa kata ya usanda walilamikia juu ya ukosefu wa maji kwa muda mrefu. Mtatiro alieleza kuwa mradi wa maji wa Tinde package uko katika hatua ya manunuzi ya vifaa kwa sasa na muda wowote maji yataanza kuwafikia wananchi.

“Tulifanyia kazi kwa kushirikiana na katibu wa wizara ya maji, Mbunge wa jimbo solwa na viongozi wa serikali ya India mkoani Dodoma kujadili na kufikia hatua nzuri na mchakato wa manunuzi ya vifaa unaendelea kwa sasa”anasema Mtatiro

MADINI.

Wakazi wa kitongoji cha Mhivi kata ya Usanda Pascal Ntwanga na Maganga Nohiwe walieleza kuathiriwa na mlipuko ya baruti inayoa athiri watoto wao na kuharibu nyumba zao kwa nyufa.

Mtatiro ameagiza Ofisi ya madini mkoa wa Shinyanga kwa kushirikiana na serikali ya kitongoji cha Mhivi kufanya mkutano ili wananchi watoe changamoto zao na kupanga utaratibu mzuri baina ya wananchi na mwekezaji.

“Naagiza ofisi ya madini kukutana na wananchi ndani ya siku 14 kwa kufanya mkutano na wananchi wa kitongoji nakushauri tujenge nyumba zenye uimara”anasema Mtatiro.